पाल्पा – पाल्पा जिल्लाका स्थानीय तहहरूमध्ये धार्मिक र पर्यटकीय दृष्टिकोणले रम्भा गाउँपालिका एक विशिष्ट पहिचान बोकेको गाउँपालिका हो। साविकका हुँगी, फोक्सिङकोट, पिपलडाँडा, हुमिन, ताहुँ र हेक्लाङ (वडा नं. ९) मिलेर बनेको यो गाउँपालिका ५ वटा वडाहरूमा विभाजित छ।
यस गाउँपालिकाको नाम यहाँको प्रसिद्ध शक्तिपीठ रम्भादेवी मन्दिरको नामबाट राखिएको हो। रम्भादेवी मन्दिर यस क्षेत्रकै आस्थाको केन्द्र मानिन्छ। धार्मिक मात्र नभई प्राकृतिक रूपमा पनि यो गाउँपालिका निकै धनी छ। पाल्पाकै दोस्रो अग्लो शिखर रिमिघा लेक यसै गाउँपालिकामा पर्दछ, जहाँबाट मनोरम हिमश्रृंखला र पहाडी दृश्यावलोकन गर्न सकिन्छ।
कुल ९४.१२ वर्ग किलोमिटर क्षेत्रफलमा फैलिएको यस गाउँपालिकाको सिमाना पूर्वमा रामपुर र पूर्वखोला, पश्चिममा माथागढी र बगनासकाली, उत्तरमा कालीगण्डकी नदी र दक्षिणमा माथागढी र पूर्वखोला गाउँपालिकासँग जोडिएको छ।
जनसंख्या र समुदाय: आर्थिक वर्ष २०७९/८० को घरधुरी सर्वेक्षण अनुसार यहाँको कुल जनसंख्या १९,४८७ रहेको छ। यहाँ मुख्यगरी मगर, ब्राह्मण, क्षेत्री र दलित समुदायको बसोबास छ भने हिन्दु धर्मावलम्बीहरूको बाहुल्यता रहेको छ।
भौगोलिक सुगमताका हिसाबले यो गाउँपालिका रणनीतिक स्थानमा छ। यसको पश्चिममा सिद्धार्थ राजमार्ग, उत्तर-पूर्वमा कालीगण्डकी कोरिडोर र दक्षिणमा रामपुर जोड्ने सडक सञ्जाल रहेको छ, जसले गर्दा यहाँ उत्पादित कृषि उपज र पर्यटकीय आवतजावतमा सहजता पुगेको छ।
