पाल्पा-पाल्पा जिल्लाको उत्तर-पूर्वी भेगमा अवस्थित रम्भा गाउँपालिका यतिबेला धार्मिक र प्राकृतिक पर्यटनको एउटा बलियो संगम स्थलका रूपमा उदाउँदै छ। ऐतिहासिक र सांस्कृतिक धरोहरले भरिपूर्ण यो क्षेत्रले आफ्नो मौलिक पहिचानमार्फत आन्तरिक तथा बाह्य पर्यटक लोभ्याउन थालेको छ।
यस गाउँपालिकाको नामकरण नै यहाँको प्रसिद्ध शक्तिपीठ रम्भादेवी मन्दिरको नामबाट गरिएको हो। रम्भादेवीलाई यस क्षेत्रकै सबैभन्दा ठुलो आस्थाको केन्द्र मानिन्छ। मन्दिरको धार्मिक महिमा यस्तो छ कि यहाँ नेपालका विभिन्न जिल्लाका साथै भारतबाट समेत भक्तजनहरू दर्शनका लागि आउने गर्दछन्। विशेष गरी चाडपर्व र मेलाका समयमा यहाँ श्रद्धालुहरूको ठुलो घुइँचो लाग्ने गर्दछ, जसले स्थानीय अर्थतन्त्रमा समेत सकारात्मक प्रभाव पारेको छ।
धार्मिक आस्था मात्र होइन, रम्भा गाउँपालिका प्राकृतिक सौन्दर्यमा पनि उत्तिकै अब्बल छ। पाल्पा जिल्लाकै दोस्रो अग्लो शिखरको रूपमा रहेको रिमिघा लेक यसै गाउँपालिकाको मुख्य पर्यटकीय गहना हो। रिमिघा लेकको टाकुराबाट उत्तरतर्फका मनमोहक सेता हिमश्रृंखला र दक्षिणतर्फका लहरै मिलेका पहाडी भू-भागको दृश्यले जोकोहीलाई मन्त्रमुग्ध बनाउँछ। पछिल्लो समय यो क्षेत्र हाइकिङ, वनभोज र फोटोग्राफीका लागि युवापुस्ताको पहिलो रोजाइ बन्न थालेको छ।
स्थानीय सरकारले रम्भादेवी मन्दिर र रिमिघा लेकलाई एउटै सूत्रमा बाँधेर “धार्मिक-पर्यटकीय सर्किट” विकास गर्ने योजना अघि सारेको छ। सडक पूर्वाधारको स्तरोन्नति र पर्यटकीय सुविधाहरू (भ्यु-टावर, पदमार्ग, र विश्रामस्थल) थप गर्न सकेमा यसले समग्र गाउँपालिकाको आर्थिक समृद्धिमा कोसेढुङ्गा सावित हुने देखिन्छ।
स्थानीय जनप्रतिनिधि नानीमैयाँ गन्धर्वका अनुसार यस क्षेत्रको विकासमा स्थानीय तह निकै गम्भीर छ। उनी भन्छिन्—”रम्भादेवीको आशीर्वाद र रिमिघाको काखमा रहेको यो गाउँपालिका सुन्दरताको खानी हो। हामी यसको ऐतिहासिक गरिमा जोगाउँदै पर्यटन प्रवर्धन र संरक्षणका कार्यमा सक्रियताका साथ जुटेका छौँ।”
यसरी एकातिर प्राचीन मन्दिरको सुगन्ध र अर्कोतिर लेकाली चिसो हावापानीले गर्दा रम्भा गाउँपालिका पाल्पा भ्रमणमा आउने जोसुकैका लागि एक ‘मस्ट भिजिट’ गन्तव्य बन्ने निश्चित छ।
