पाल्पा-तानसेन नगरपालिकाले महिलाहरुको महान पर्व हरितालिका तीजको अवसरमा नगरस्तरीय तीज गीत प्रतियोगिता सम्पन्न गरेको छ ।
हराउन लागेको कला र सस्कृतिको जर्गेना गर्न नगरपालिकाले प्रतियोगिता आयोजना गरेको जनाएको छ । “महिलाहरुको सहभागिता शुशासन दिगो विकास र पारर्दशिता,“ विषयमा भएको प्रतियोगितामा प्रथम मेहलधारा टोल विकास संस्था, द्वितीय नारनडाडा शिवालय टोल विकास संस्था, तृतीय सिर्जनशील टोल विकास संस्थाले स्थान हासिल गरेका छन् ।
साथै शान्तवना समाज टोल विकास संस्थाको समूह सान्त्वना भएका छन् । प्रतियोगितामा प्रथम हुने समूहले नगद २५ हजार,दोस्रो हुनेले १५ हजार, तेस्रो हुनेले १० हजार, सान्त्वना हुने समूहले ५ हजार र सहभागी समूहले २ हजार नगद, र प्रमाणपत्र प्राप्त गरेका छन् । नगरपालिका भित्रका १४ वडामध्य २३ समूहको सहभागी रहेको प्रतियोगितामा पुराना लोकलयमा आधारित तीज गीत, विकृति विसंगती माथी प्रहारका नयाँ रचना र महिला सहभागिता,विकास,शुशासन, समेटीएको भेषभूषाका मौलिकतालाई विशेष प्राथमिकतामा राखेर मुल्याङकन गरिएको निर्णायक मण्डलका संयोजक राम प्रशाद अर्यालले बताए ।
प्रतियोगिताका प्रमुख अतिथि रामग्राम नगरपालिकाका उप प्रमुख सम्झना चौधरीले महिलाहरुको महान चाड हरितालिका तीजको अबसरमा मनोरञ्जन मात्र नभई कला, संस्कृति, परम्पराको संरक्षणमा लाग्नुपर्ने बताइन् । पछिल्लो समय तीज भड्किलो, खर्चिलो बन्दै गएकोले मौलिकतालाई बचाउदै तीज पर्व मनाउनु पर्नेमा बताइन् ।नगरपालिकाका उप प्रमुख प्रतिक्षा गाहा सिङजालीले मौलिक कला संस्कृतीको जर्गेना गर्दै एक आपसमा भेटघाट गराउने, दुःख सुख साट्ने काम गरेको बताउदै महिला अधिकारका विषयमा जानकारी गराउन प्रतियोगिता आयोजना गरिएको बताइन् । नगरस्तरीय तीज गीत प्रतियोगिताले आपसी सद्भाव कायम गर्न सहयोग पुग्ने बताइन् ।
प्रतियोगितामा नगरका विभिन्न वडाबाट महिला समूहहरू विभिन्न सघंसंस्थाका प्रमुख तथा प्रतिनिधिको सहभागिता रहेको थियो।
कार्यक्रम सबिता भट्राइको स्वागत, चिना न्यौपानेको संचालनमा सम्पन्न भएको हो।
